ଦୁର୍ବୃତ୍ତଙ୍କ କଳା ପାହାରରେ ଭାଙ୍ଗିଲା କଲରା ଚାଷୀର ମେରୁଦଣ୍ଡ
ବରଗଡ଼, ୧୪/୩(ସଂସ୍କୃତି ମିଡ଼ିଆ )– କଥାରେ ଅଛି *ଚାଷ କାମ ଯାହାର କେଡେ ସୁଖ ତାହାର ସେ ସିନା ଦୁନିଆଁକୁ ଯୋଗାଉଛି ଆହାର l* ହେଲେ ଦର୍ଶକ ବନ୍ଧୁ ଏ ଉକ୍ତିଟି ଆଜିର ଦିନରେ ଓଲଟି ଯାଇଛି l ଚାଷ କାମ ଯାହାର କେଡେ ଦୁଃଖ ତାହାର…… ହୋଇ ଯାଇଛି l
ସବୁ ବେଳେ ଚାଷୀ ଦୁଃଖର ଦୁର୍ଦ୍ଦଶା ଭିତରେ ବାନ୍ଧି ହେବାକୁ ପଡୁଛି l କେତେବେଳେ ସାର ତ କେତେବେଳେ ଔଷଧ l ଶେଷକୁ ଧାନ ବିକ୍ରିବେଳେ ଟୋକନ ସମସ୍ୟା l ପୁଣି ସେହିଭିତରେ ପ୍ରାକୃତିକ ବିପର୍ଯ୍ୟୟ l ହେଲେ ଦର୍ଶକ ବନ୍ଧୁ ଯେଉଁ ଚାଷୀ ମୁଣ୍ଡ ଝାଳ ତୁଣ୍ଡେ ମାରି ଦୁନିଆକୁ ଆହାର ଦେଉଛି, ସେହି ଚାଷୀଙ୍କୁ ସର୍ଵଶାନ୍ତ କରୁଛନ୍ତି ଦୁର୍ବୃତ୍ତ
ଜଣେ ଚାଷୀ ରକ୍ତକୁ ପାଣି କରି ଫସଲ ଉଜେଇଥିବା ବେଳେ, ଅମଳ ସମୟରେ ଦୁର୍ବୃତ୍ତଙ୍କ କଳା ପାହାର ଚାଷୀର ମେରୁଦଣ୍ଡ ଭାଙ୍ଗି ଦେଇଛି। ଥରେ ନୁହଁ ଦୁଇ ଥର ନୁହଁ, ଯେତେବେଳେ ଵି ବରଗଡ଼ ବ୍ଲକ ଅନ୍ତର୍ଗତ ଜମୁର୍ଡା ଗ୍ରାମରେ ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି, ଯେଉଁଠାରେ ଦୁର୍ବୃତ୍ତମାନେ ଶତାଧିକ କଲରା ଗଛକୁ ଉପାଡ଼ି ନଷ୍ଟ କରିଦେଇଛନ୍ତି।
ସୂଚନା ଅନୁଯାୟୀ, ଜମୁର୍ଡା ଗ୍ରାମର ଚାଷୀ ଗଜିନ ମାଝୀ l ନିଜ ଜମିରେ କଲରା ଚାଷ କରିଥିଲେ। ଶୁକ୍ରବାର ବିଳମ୍ବିତ ରାତିରେ କିଛି ଅଜ୍ଞାତ ଦୁର୍ବୃତ୍ତ ତାଙ୍କ କିଆରୀରେ ପଶି ପ୍ରାୟ ୩୦୦ କଲରା ଗଛକୁ ଉପାଡ଼ି ଫିଙ୍ଗି ଦେଇଛନ୍ତି। ଶନିବାର ସକାଳେ ଗଜିନ ଜମିକୁ ଯାଇଥିବା ବେଳେ ନିଜର ଶ୍ରମ ନଷ୍ଟ ହୋଇଥିବା ଦେଖି ସ୍ତବ୍ଧ ହୋଇଯାଇଥିଲେ।
ଏହି ଘଟଣାକୁ ନେଇ ଗଜିନ ବରଗଡ଼ ଗ୍ରାମାଞ୍ଚଳ ଥାନାରେ ଲିଖିତ ଏତଲା ଦେବା ପରେ ପୋଲିସ ତତ୍ପରତା ପ୍ରକାଶ କରିଛି। ପୋଲିସ ଏବଂ ସ୍ନିଫର୍ ଡଗ୍ (ଅନୁସନ୍ଧାନୀ କୁକୁର) ଜରିଆରେ ତଦନ୍ତ ଜାରି ରହିଛି। ତେବେ ବର୍ତ୍ତମାନ ସୁଦ୍ଧା ଅଭିଯୁକ୍ତଙ୍କ ସମ୍ପର୍କରେ କୌଣସି ସୂଚନା ମିଳିପାରି ନାହିଁ।
ଜମୁର୍ଡା ଗ୍ରାମରେ ଏହା ପ୍ରଥମ ଘଟଣା ନୁହେଁ। ପୂର୍ବରୁ ମଧ୍ୟ ଅନେକ ଥର ଚାଷୀଙ୍କ ପରିବା କିଆରୀ ନଷ୍ଟ କରାଯାଉଥିବା ନେଇ ଅଭିଯୋଗ ହୋଇଛି। କିନ୍ତୁ ଅଭିଯୁକ୍ତମାନେ ଧରା ନ ପଡ଼ିବା ପ୍ରଶାସନ ଓ ପୋଲିସର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଏହି ଘଟଣା ଜାଣିବା ପରେ ସଂଯୁକ୍ତ କୃଷକ ସଙ୍ଗଠନର ଉପଦେଷ୍ଟା ରମେଶ ମହାପାତ୍ର ଯାଇ କ୍ଷତିଗ୍ରସ୍ତ ଚାଷୀଙ୍କୁ ସମବେଦନା ଜ୍ଞାପନ କରିବା ସହିତ ଦୋଷୀ ବିରୋଧରେ ଦୃଷ୍ଟାନ୍ତ ମୂଳକ ପଦକ୍ଷେପ ନେବା ପାଇଁ ପ୍ରଶାସନ ଠାରେ ଦାବୀ କରିଛନ୍ତି।
ବାରମ୍ବାର କ୍ଷୟକ୍ଷତି ସହୁଥିବା ଚାଷୀମାନେ ଏବେ ଭୟ ଓ ଆଶଙ୍କାରେ ରହିଛନ୍ତି।
