ସି.ଆଇ.ଏସ.ଏଫ ଯବାନ ବିଜୟଙ୍କ ଶେଷକୃତ୍ୟ ସମ୍ପର୍ଣ୍ଣ
ଅତାବିରା , 19/12(ସଂସ୍କୃତି ମିଡ଼ିଆ )- ବରଗଡ଼ ଜିଲା ଅତାବିରା ବ୍ଲକ ଅନ୍ତର୍ଗତ କେନ୍ଦପାଲି ଗ୍ରାମର ଜୈନିକ ଯବାନ ବିଜୟ ପ୍ରଧାନ (27)ଙ୍କ ଦୁର୍ଘଟଣାରେ ବୁଧବାର ବିୟୋଗ ଘଟିଥିଲା l ଗୁରୁବାର ମୃତ ବିଜୟଙ୍କ ପାର୍ଥିବ ଶରୀର ଗାଁକୁ ଆସିବାପରେ ରାଷ୍ଟ୍ରୀୟ ମଯ୍ୟାଦା ସହ ଶେଷ କୃତ୍ୟ ସମ୍ପର୍ଣ୍ଣ ହୋଇଛି l
ସ୍ବର୍ଗତ ବିଜୟ 2017 ମସିହାରୁ କଳ୍ପକ୍କାମ ସ୍ଥିତ ସି.ଆଇ.ଏସ.ଏଫ ୟୁନିଟ ଡିଇଟି ରେ ନମ୍ବର 170822509 CT / GD ଭାବେ କାର୍ଯ୍ୟରତ ଥିଲେ l ଚଳିତ ଡିସେମ୍ବର ମାସ ୯ ତାରିଖ ବିଜୟ ଛୁଟିରେ ନିଜ କେନ୍ଦପାଲି ସ୍ଥିତ ଘରକୁ ଆସିଥିଲେ l କୌଣସି ଏକ କାମରେ ଗତକାଲି ବୁଧବାର ବିଜୟ ତାଙ୍କ ବନ୍ଧୁ ଏମ ବାଲକୃଷ୍ଣ ଙ୍କ ସହ ନିଜ ବୁଲେଟ ବାଇକ ନମ୍ବର ଓଡ଼ି 17ଏଡ଼ି 1587 ଯୋଗେ ସମ୍ବଲପୁର ଯଇଥିଲେ l ସମ୍ବଲପୁରରୁ ସନ୍ଧ୍ୟାରେ ଫେରୁଥିବା ବେଳେ ସମ୍ବଲପୁର -ବରଗଡ଼ 53 ନମ୍ବର ଜାତୀୟ ରାଜପଥର ଗୋଡ଼ଭଗା ନିକଟସ୍ଥ ଘୁଡୁକାଟିକ୍ରା ଛକରେ ହଠାତ ଏକ ପିକଅପ ଭେନ ନମ୍ବର ଓଡ଼ି 15ସି / 6031 ଅପରପାର୍ଶ୍ୱ ରାସ୍ତାକୁ ଯିବାକୁ କ୍ରସିଂ ଆଡ଼କୁ ଗାଡି ବୁଲାଇ ଦେବାରୁ ପଛରେ ଆସୁଥିବା ବିଜୟଙ୍କ ବୁଲେଟରେ ପିକଅପ ବାଡେଇ ହୋଇଥିଲା ବୋଲି ପରିବାର ଲୋକେ ଅଭିଯୋଗ କରିଛନ୍ତି l ଫଳରେ ବିଜୟ ଓ ତାଙ୍କ ବନ୍ଧୁ ବାଲକୃଷ୍ଣ ଦୁହେଁ ଗୁରୁତର ଆହତ ହୋଇଥିଲେ l ଉଭୟଙ୍କୁ ସ୍ଥାନୀୟ ଲୋକେ ଉଦ୍ଧାର କରି ବୁର୍ଲା ଡାକ୍ତରଖାନା ନେଇଥିଲେ l ହେଲେ ସେଠାରେ ଡାକ୍ତର ବିଜୟଙ୍କୁ ମୃତ ଘୋଷଣା କରିଥିଲେ l ଶବ ବ୍ୟବଛେଦ ପରେ ଗୁରୁବାର ମଧ୍ୟାହ୍ନରେ ବିଜୟ ଙ୍କ ମର ଶରୀର କେନ୍ଦପାଲି ଗ୍ରାମକୁ ପହଞ୍ଚିଲା ପରେ ସ୍ତବ୍ଧିଭୁତ ହୋଇପଡ଼ିଥିଲେ ଗ୍ରାମବାସୀ l କାନ୍ଦ ବୋବାଳିରେ ଫାଟି ପଡିଥିଲା ବିଜୟଙ୍କ ଘର l ମାଁ ତପସ୍ୱିନୀ ପ୍ରଧାନ କାନ୍ଦି କାନ୍ଦି ପୁଅ ବିଜୟ ଙ୍କୁ ଶେଷ ଦର୍ଶନ କରିଥିଲେ l ଉପସ୍ଥିତ ଗଣ୍ୟମାନ୍ୟଙ୍କ ସମେତ ଗ୍ରାମବାସୀ ଜଣଙ୍କ ପରେ ଜଣେ ଅଶ୍ରୁଳ ନୟନରେ ପୁଷ୍ପ ମାଲ୍ୟ ଦେଇ ସ୍ବର୍ଗତ ଯବାନ ବିଜୟଙ୍କୁ ଶେଷ ଦର୍ଶନ କରିଥିଲେ l ଗାଁ ଶ୍ମଶାନରେ କଳ୍ପକ୍କାମ ସ୍ଥିତ ସି.ଆଇ.ଏସ.ଏଫ ୟୁନିଟ ଡିଇଟିରୁ ସବ ଇନିସ୍ପେକ୍ଟର ଏସ. କେ ଯାଦବଙ୍କ ନେତୃତ୍ୱରେ ଆସିଥିବା ସହଯୋଗୀ ସ୍ବର୍ଗତ ବିଜୟ ପ୍ରଧାନଙ୍କୁ ତୋପ ସଲାମୀ (guard of honour) ପ୍ରଦାନ କରାଯାଇଥିଲା l ପରେ ବଡ଼ ଭାଇ ଦାମ୍ବୋଦର ପ୍ରଧାନ ମୁଖାଗ୍ନୀ ଦେଇଥିଲେ l
କଳ୍ପକ୍କାମ ସ୍ଥିତ ସି.ଆଇ.ଏସ.ଏଫ ୟୁନିଟ ଡିଇଟିର ଡିଜି ନମିସ୍ କୁମାର ସିଂ ଏକ ଶୋକ ପତ୍ରରେ ବିଜୟଙ୍କ ଅକାଳ ବିୟୋଗରେ ମୁଁ ମୋର ଗଭୀର ସମବେଦନା ଜଣାଉଛି l ଏହି ଦୁଃଖଦ ମୁହୂର୍ତ୍ତରେ ଆମେ ଆପଣଙ୍କ ସହିତ ଛିଡା ହୋଇଛୁ ଏବଂ ସର୍ବଶକ୍ତିମାନ ଆପଣଙ୍କୁ ଏବଂ ଆପଣଙ୍କ ପରିବାରକୁ ଏହି ଅପୂରଣୀୟ କ୍ଷତି ସହିବାକୁ ଶକ୍ତି ପ୍ରଦାନ କରିବା ସହ ବିଜୟଙ୍କ ଅମର ଆତ୍ମା ଶାନ୍ତିରେ ବିଶ୍ରାମ କରନ୍ତୁ ବୋଲି ଉଲ୍ଲେଖ କରି ବାପା ଗୁରୁଚରଣ ପ୍ରଧାନଙ୍କୁ ପ୍ରଦାନ କରିଛନ୍ତି l
